Preguntas e consultas
Preguntas frecuentes
As dúbidas que máis se repiten cando unha comunidade pensa en ter gando no monte. Se a túa non está aquí, envíanola.
Quen decide que entre gando no monte veciñal?
A comunidade, a través da súa asemblea xeral de comuneiros e comuneiras. É recomendable que o acordo quede recollido en acta e que concrete o modelo (gando propio, cesión a unha persoa gandeira ou unha fórmula mixta), a zona e as condicións.
Véxase a guía 1, Decisión comunitaria.
Ten que ser o gando da comunidade ou pode ser dunha persoa gandeira?
Cantos animais pode manter o noso monte?
Depende da superficie que realmente se pode pastar, do tipo de vexetación, da auga e da época do ano. Mídese en carga gandeira: unidades de gando maior (UGM) por hectárea, unha forma de comparar especies diferentes (unha vaca adulta non come o mesmo ca unha cabra).
Véxanse as guías 2 e 3 e a calculadora de carga gandeira.
Que trámites hai que facer antes de soltar os animais?
Como mínimo, inscribir a explotación no REGA (Rexistro Xeral de Explotacións Gandeiras), ter os animais identificados, rexistrar os movementos e cumprir os programas sanitarios. Segundo o monte, pode haber consultas previas por Rede Natura 2000 ou outras limitacións.
Véxase a guía 4, Tramitación.
Necesitamos pechar todo o monte?
Non sempre. Hai peches fixos, peches móbiles electrificados e vallado virtual, e adoitan combinarse. A elección depende da especie, do terreo, das estradas próximas e do orzamento.
Véxase a guía 5, Infraestruturas.
Como funciona o vallado virtual?
Cada animal leva un colar con GPS. A zona de pastoreo debúxase no mapa do móbil e, cando o animal se achega ao límite, o colar emite un son; se continúa, recibe un pequeno estímulo eléctrico. Co tempo, o gando aprende a respectar o son. A comunidade de Vincios usa este sistema.
Que podemos facer para protexer o gando do lobo?
A prevención combina varias medidas: cans de garda, peches nocturnos ou para as parideiras, recoller as crías nas primeiras semanas e vixiar as zonas de risco. A guía explica tamén que facer se hai un ataque.
Véxase a guía 6, Manexo.
Hai axudas para comezar?
Hai liñas da PAC (incluídos os ecorréximes de pastoreo extensivo), da Xunta e doutras administracións, pero os requisitos e as convocatorias cambian cada ano. A guía resume as vixentes e como se calcula a viabilidade sen contar con elas.
Véxase a guía 7, Viabilidade.
O gando axuda a previr incendios?
Pode axudar, porque reduce o mato e a herba seca que alimentan o lume, sempre que a carga e o manexo sexan os axeitados. Non substitúe as obrigas de xestión da biomasa nin os plans de prevención.
Véxase a guía 8, Seguimento e o vídeo 2.
Como sabemos se o pastoreo está a funcionar?
Cun seguimento sinxelo e regular: estado do mato e da herba, condición corporal dos animais, incidencias, custos e ingresos. Fotos desde os mesmos puntos cada ano dan moita información con pouco esforzo.
Véxase a guía 8, Seguimento.
Envía a túa pregunta
Formulario de consultas
Ao premer «Preparar o correo» abrirase o teu programa de correo coa consulta xa escrita, para que a revises e a envíes. Esta web non garda ningún dato. As preguntas que se repitan incorporaranse a esta páxina, sempre sen nomes.